Bible

1 最先，𠊎勸你，愛為萬民對上帝來懇求、祈禱、代禱、㧯感恩； 2 也愛為君王㧯一切有權勢个人祈禱，使𠊎等有恬靜㧯和平个日仔，來過敬虔㧯端正个生活。 3 這係好事，係𠊎等个救主上帝所歡喜个。 4 上帝愛每一個人得救，攏總認識真理。 5 因為只有一位上帝，在上帝㧯人个中間只有一位中保，就係成做人个基督耶穌； 6 佢犧牲自家來使人類得到自由；這件事在時機成熟个時就證明出來。 7 為到恁樣，𠊎奉差派做傳道人、使徒、㧯外邦人个教師，來使佢等相信並認識真理。𠊎無講花撩；𠊎所講个全部係真實个！ 8 在各所在个聚會，𠊎希望男人擎等聖潔个手來祈禱，全無發譴，也無辯論。 9 𠊎也希望婦女著衫愛端莊、大方㧯合適；莫辮奇奇怪怪个頭那毛；莫用金仔、珍珠、抑係盡貴个服裝來打扮。 10 愛用好行為來表明自家係敬畏上帝个婦女。 11 婦女愛恬恬來學習，凡事順服。 12 𠊎毋准婦女教訓人，抑係管轄男人；姖等愛安靜正好。 13 因為上帝先造亞當，然後正係夏娃。 14 受引誘个毋係亞當，係女人；姖受引誘，違悖上帝个禁令。 15 總係，婦女若安份守己，堅持信心、愛心、㧯聖潔，就會通過生養子女來得救。